भीषण अपघातात दोन सख्ख्या भावांसह तिघांचा मृत्यू रामपुरे कुटुंबीयांवर कोसळला दु:खाचा डोंगर
भीषण अपघातात दोन सख्ख्या भावांसह तिघांचा मृत्यू रामपुरे कुटुंबीयांवर कोसळला दु:खाचा डोंगर
लातूर (प्रतिनिधी)
पीकअप व दुचाकीची जोराची धडक होऊन झालेल्या भीषण अपघातात दोन सख्ख्या भावसह तिघांचा जागीच मृत्यू झाल्याची घटना सोमवारी रात्री उमरगा – लातूर महामार्गावरील माडज पाटीजवळील अमराई समोर घडली.
मिळालेल्या माहितीनुसार औसा तालुक्यातील मंगळूर येथील दीपक वसंत रामपूरे (वय २७) व आकाश सूर्यकांत रामपुरे (वय २५) हे दोघे सख्खे चुलत भाऊ सोमवारी कामानिमित्त उमरगा शहरात आले होते. दरम्यान, काम आटोपून ते दुचाकीवरून (एम.एच. ५ ए.एन. ०५५४) ते गावाकडे परत जाताना माडज पाटी नजीक ट्रकने पिकअपला (एम.एच. २५ पी. ३४०८) ठोकरल्याने तो दुचाकीवर जावून धडकला. या अपघातामध्ये दीपक रामपुरे आणि आकाश रामपुरे या सख्या चुलत भावांसह पिकअपमध्ये चालकाच्या बाजुला बसलेले येळी (ता. उमरगा) येथील दिंगबर गिरजप्पा कांबळे (५७) या शेतकऱ्याचा जागीच मृत्यू झाला. तर पिकअप चालक संतोष स्वामी आणि मारुती रेड्डी (रा. दोघेही येळी, ता. उमरगा) हे जखमी झाले. अपघात झाल्यानंतर तिघेही रस्त्यावर पडलेले हाेते. यावेळी महामार्गावरुन जाणारे एकही वाहन थांबत नव्हते. याचवेळी माडज येथील वैजिनाथ उर्फ नाना काळे यांनी पळसगांव (ता. उमरगा) येथील अजय कदम यांची उमरग्याकडे निघालेली जीप थांबवली. या दोघांनी तिघांनाही प्रथम खासगी रुग्णालयात उपचारासाठी दाखल केले. तेथील डॉक्टरांनी तपासून तिघांनाही मृत घोषित केले. त्यानंतर मृतदेह उमरगा येथील उपजिल्हा रुग्णालयात नेण्यात आले. यावेळी नातेवाईकांनी मोठी गर्दी केली होती या घटनेने सर्वत्र हळहळ व्यक्त होत आहे.
