Skip to content
२५ हजारांची लाच स्वीकारताना अंबाजोगाईचे सहकार अधिकारी संतोष भंडारी एसीबीच्या जाळ्यात
अंबाजोगाई: (प्रतिनिधी )
येथील सहाय्यक निबंधक कार्यालयातील सहकार अधिकारी संतोष भंडारी यास २५ हजार रुपयांची लाच स्वीकारताना जालना येथील लाचलुचपत प्रतिबंधक विभागाच्या (एसीबी) पथकाने सोमवारी दुपारी रंगेहात पकडले. एका पतसंस्थेविरुद्धच्या तक्रारी निकाली काढण्यासाठी भंडारी याने संबंधित संस्थेच्या सचिवाकडे ५० हजार रुपयांच्या लाचेची मागणी केली होती. त्यापैकी पहिला हप्ता स्वीकारताना ही मोठी कारवाई करण्यात आली असल्याची माहिती सूत्रांनी दिली.
मिळालेल्या प्राथमिक माहितीनुसार, संबंधित पतसंस्थेच्या विरोधात असलेल्या तक्रारींचे निवारण करण्याच्या बदल्यात भंडारी यांनी लाचेची मागणी केली होती. या प्रकरणी पतसंस्थेच्या सचिवांनी जालना येथील लाचलुचपत प्रतिबंधक विभागाकडे रीतसर तक्रार नोंदवली होती. या तक्रारीची शहानिशा केल्यानंतर एसीबीच्या पथकाने सोमवारी दुपारी अंबाजोगाई येथील सहाय्यक निबंधक कार्यालयात सापळा रचला. लाचेच्या एकूण ५० हजार रुपयांपैकी २५ हजार रुपये स्वीकारण्याचे ठरले होते. ही रक्कम स्वीकारताना पथकाने भंडारी यांना रंगेहात ताब्यात घेतले. लाचलुचपत प्रतिबंधक विभागाकडून संतोष भंडारी याच्यावर गुन्हा दाखल करण्याचे काम सुरू असून या प्रकरणातील अधिक तपशील तपासानंतर समोर येईल असे पथकाकडून सांगण्यात आले आहे.
संतोष भंडारी वर्षानुवर्ष अंबाजोगाईच्या कार्यालयातच का?
प्राप्त माहितीनुसार लाचलुचपत प्रतिबंधक विभागाच्या पथकाने 25 हजार रुपयाची लाच स्वीकारताना पकडलेले संतोष भंडारी हे मागील अनेक वर्षापासून अंबाजोगाई येथील कार्यालयातच खुर्चीला चिटकून असून केवळ राजकीय वरदहस्थाचा फायदा घेऊन संतोष भंडारी यांचा या कार्यालयावर सातत्याने दबदबा राहिलेला आहे.
आज पर्यंत या कार्यालयात अनेक अधिकारी आले आणि गेले मात्र संतोष भंडारी हे वर्षानुवर्ष अंबाजोगाईच्याच कार्यालयातील खुर्चीला चिटकून असल्याने याचीही चौकशी होणे गरजेचे असल्याची प्रतिक्रिया नागरिकांतून व्यक्त होताना दिसते आहे.
Post Views: 647
error: Content is protected !!
