नगर परिषद निवडणुकीच्या अनुषंगाने अंबाजोगाई शहर पोलीस स्टेशनच्या वतीने नागरिकांना आवाहन

नगर परिषद निवडणुकीच्या अनुषंगाने अंबाजोगाई शहर पोलीस स्टेशनच्या वतीने नागरिकांना आवाहन

अंबाजोगाई (प्रतिनिधी)

    अंबाजोगाई नगरपरिषद निवडणुकीच्या पार्श्वभूमीवर शहरातील कायदा व सुव्यवस्था अबाधित राखण्यासाठी सर्व राजकीय पक्षांचे उमेदवार, पदाधिकारी, कार्यकर्ते तसेच नागरिकांना बीड जिल्हा पोलीस अधीक्षक नवनीत कावत यांच्या मार्गदर्शना नुसार अंबाजोगाई शहर पोलीस स्टेशनचे पोलीस निरीक्षक शरद जोगदंड यांच्या वतीने आवाहन करण्यात आले असून या आवाहना नुसार  नागरिकांनी 

निवडणूक प्रचार करताना शांतता, संयम व परस्पर आदर राखावा.

कोणत्याही राजकीय पक्षाच्या कार्यकर्त्यांशी वाद, भांडण, धमक्या, चिथावणीखोर वक्तव्ये किंवा कोणत्याही प्रकारचा हिंसाचार करणे टाळावे.

कोणताही जातीयवाद, धर्माधारित वक्तव्ये किंवा भेदभावपूर्ण प्रचार करू नये. अशा कृतींवर कठोर कारवाई करण्यात येईल.

सोशल मीडियावर (WhatsApp, Facebook, Instagram, X इ.) चुकीचे, आक्षेपार्ह, द्वेषपुर्ण किंवा भडकाऊ पोस्ट, व्हिडिओ अथवा संदेश प्रसारित केल्यास सायबर कायद्यांनुसार कठोर कारवाई करण्यात येईल.

सर्वांनी “वाद नको, मतदान करा” या लोकशाही संदेशाचे पालन करावे.

कोणतीही संशयास्पद हालचाल, वाद, गोंधळ अथवा गटबाजीची घटना आढळल्यास तत्काळ अंबाजोगाई शहर पोलीस ठाण्यास संपर्क साधावा.

लक्षात ठेवा — निवडणुका या काही काळापुरत्या मर्यादित  असतात, परंतु आपले नातेसंबंध हे परंपरागत, चिरस्थायी आणि सामाजिक सलोखा राखणारे असतात. त्यामुळे कोणत्याही मतभेदाने आपली माणुसकी आणि आपले आपलेपण ढळू देऊ नका.

अंबाजोगाई शहरातील नागरिक हे सुसंस्कृत, शांतताप्रिय व संस्कृती पाळणारे आहेत. ही परंपरा, शिस्त आणि सांस्कृतिक ओळख कायम राखणे ही सर्वांची सामूहिक जबाबदारी आहे.

अंबाजोगाई शहरातील शांतता, सौहार्द आणि लोकशाही मूल्ये जपण्यासाठी प्रत्येक कार्यकर्त्याने जबाबदारपणे वर्तन करावे

    असे आवाहन अंबाजोगाई शहर पोलीस स्टेशनच्या वतीने करण्यात येत आहे.