*अंबाजोगाई नगर पालिका आमच्या ताब्यात दिल्यास शहराचा चेहरा बदलेल – आ. नमिता मुंदडा* *योगेश्वरी मंदिर परिसरातील उद्यान सुशोभीकरणाचे भूमिपूजन संपन्न*

*अंबाजोगाई नगर पालिका आमच्या ताब्यात दिल्यास शहराचा चेहरा बदलेल – आ. नमिता मुंदडा*

*योगेश्वरी मंदिर परिसरातील उद्यान सुशोभीकरणाचे भूमिपूजन संपन्न*

अंबाजोगाई : ऐतिहासिक योगेश्वरी मंदिर परिसराचे सौंदर्य आणखी खुलवण्यासाठी अमृत 2.0 योजनेअंतर्गत करण्यात येणाऱ्या उद्यान सुशोभीकरण कामाचा भूमिपूजन समारंभ शुक्रवारी (दि. )२४) सायंकाळी पार पडला. या कामामुळे मंदिर परिसर अधिक आकर्षक, स्वच्छ आणि पर्यटकांसाठी सोयीस्कर होणार आहे. “नगर पालिका आमच्या ताब्यात दिल्यास अंबाजोगाईचा चेहरा बदलून टाकू,” असा ठाम निर्धार आमदार नमिता मुंदडा यांनी याप्रसंगी बोलून दाखवला.

सुशोभीकरणाच्या कामांत नवीन उद्यान रचना, पादचारी मार्ग, आधुनिक लाईटिंग, फुलबागा, बसण्याच्या जागा तसेच भक्त आणि पर्यटकांसाठी पिण्याच्या पाण्याची व स्वच्छतागृहांची सुविधा उभारली जाणार आहे. या प्रकल्पामुळे शहराच्या सौंदर्यात भर पडेल, असे मत उपस्थित मान्यवरांनी व्यक्त केले.

युवा नेते अक्षय मुंदडा यांनी सांगितले की, मागील तीन वर्षांत आमदार नमिता मुंदडा यांच्या माध्यमातून शहरात रस्ते काँक्रीटीकरण, पाणीपुरवठा योजना, नाली बांधकाम, स्ट्रीटलाईट आणि स्वच्छता मोहिम यांसारखी अनेक विकासकामे पूर्ण झाली आहेत. उद्यान सुशोभीकरण ही त्याच मालिकेतील आणखी एक महत्त्वाची पायरी आहे.

यावेळी आ. नमिता मुंदडा म्हणाल्या की, शहराचा सर्वांगीण विकास हा आमचा प्राधान्यक्रम आहे. योग्य नियोजन, पारदर्शक कामकाज आणि नागरिकांच्या सहकार्याने अंबाजोगाईला राज्यातील आदर्श शहर बनवण्याचे ध्येय त्यांनी व्यक्त केले.

त्यांनी पुढे सांगितले की, शहरातील रस्ते, पाणीपुरवठा, गार्डन, कचरा व्यवस्थापन आणि स्वच्छता या सर्व प्रश्नांवर ठोस उपाययोजना राबवली जात आहे. नागरिकांना दर्जेदार सुविधा देणे हेच आमचे उद्दिष्ट असून, नगर पालिकेचा कारभार आमच्या हाती आल्यास हे शहर नव्या रूपात दिसेल, असेही त्या म्हणाल्या.

या समारंभाला ज्येष्ठ सामाजिक कार्यकर्ते नंदकिशोर मुंदडा, डॉ. नवनाथ घुगे, रोहिणी पाठक, विलास सोनवणे, हिंदुलाल काकडे, शेख रहीम, शोभाताई लोमटे, सारंग पुजारी, संजय गंभीरे, अतुल देशपांडे यांच्यासह अनेक मान्यवर आणि नागरिक उपस्थित होते.

योगेश्वरी मंदिर परिसरातील हे सुशोभीकरण काम अंबाजोगाईच्या धार्मिक आणि पर्यटनदृष्ट्या महत्त्वाच्या ठिकाणाला नवा उजाळा देणार असून, शहराच्या विकास प्रवासातील एक महत्त्वाचे पाऊल म्हणून पाहिले जात आहे.

दत्तात्रय आंबेकर ९४२२९३१४२१