शनिशिंगणापुरात कोट्यवधींची चोरी झाल्याचा संशय ? पोलिसात तक्रार देवस्थान कर्मचारीच संशयाच्या भोवऱ्यात
शनिशिंगणापुरात कोट्यवधींची चोरी झाल्याचा संशय ? पोलिसात तक्रार देवस्थान कर्मचारीच संशयाच्या भोवऱ्यात
अहिल्यानगर
शनी देवाचे जागृत देवस्थान असल्याने ज्या गावात चोरी होत नाही, झाली तर चोरावर शनीची अवकृपा होते असे मानले जाते आणि त्यामुळेच ज्या गावात घरांना, सरकारी इमारती आणि बँकांनाही कडी कुलपे नाहीत अशा शनिशिंगणापुरात आता वेगळाच घोटाळा झाला आहे. शनैश्वर देवस्थानने भक्तांच्या सोयीसाठी मोबाईल अॅपच्या माध्यमातून ऑनलाइन शनीपूजा आणि शनीदर्शनाची सशुल्क सुविधा उपलब्ध करून दिली आहे. याचा गैरफायदा उठवत काही कर्मचाऱ्यांनीच बनावट अॅप तयार करून कोट्यवधी रुपयांचा गैरव्यवहार केल्याचा संशय आहे.
याप्रकरणी काँग्रेस आणि भाजपच्याही पदाधिकाऱ्यांनी पोलिसांकडे तक्रार केली आहे. माजी विश्वस्थांनीही तक्रार केली आहे, त्यानुसार आता याची चौकशी सुरू झाली आहे. तर दुसरीकडे देवस्थानने अधिकृतरित्या सुरू असेली ही सुविधाही बंद केल्याचे सांगण्यात येते.
काही कर्मचाऱ्यांनी देवस्थानच्या अधिकृत ॲपऐवजी बनावट ॲप तयार करून भक्तांकडून मोठ्या प्रमाणात रक्कम उकळल्याची तक्रार काँग्रेसच्या कामगार विभागाचे प्रदेशाध्यक्ष संभाजी माळवदे यांनी पोलिसांकडे केली आहे. त्यानंतर भाजपचे कार्यकर्ते व शनिभक्त विशाल सुरपुरीया यांनीही अशीच तक्रार केली आहे. भक्तांना ऑनलाइन शनिदर्शन घेता यावे, यासाठी देवस्थानने अधिकृतपणे ही सेवा सुरू केली आहे. मात्र, याचा गैरफायदा उठवत देवस्थानच्या काही कर्मचाऱ्यांनीच याच प्रकारचे मोबाईल ॲप तयार करून त्याद्वारे कोट्यवधी रुपयांची फसणूक केल्याची तक्रार आहे. ऑनलाइन पूजेच्या नावाखाली भक्तांकडून पैसे गोळा केले जातात. या बनावट ॲपवर दोन लाखांहून अधिक सदस्य नोंदणीकृत आहेत. प्रत्येक सदस्याकडून एक हजार आठशे रुपये घेतले जात असल्याचा आरोप आहे. हे शुल्क देवस्थानच्या तिजोरीत जमा न होता परस्पर कामगारांच्या खासगी खात्यात जमा होत असल्याचेही तक्रारी म्हटले आहे.
सुरपुरीया यांनी सांगितले की, शनिशिंगणापूरला लाखो भाविक दर्शनासाठी येत असतात. सध्याच्या धावपळीच्या काळात सर्व भाविकांना प्रत्याक्षात येथे येऊन पूजा व तेल अर्पण करणे शक्य होत नाही. त्यामुळे देवस्थानने आधुनिक काळाबरोबर चालत ऑनलाईन पूजाविधीसाठी व देणगीसाठी एका मोबाईल अॅपची निर्मिती केली. याची मला माहिती मिळाली तेव्हा मी जेव्हा मोबाईलमध्ये ते अॅप डाऊनलोड केले त्यावेळी देवस्थानच्या अधिकृत अॅपऐवजी अनेक बोगस अॅप दिसले. देवस्थानने अधिकृत अॅप आधीच बंद केले असून तसे जाहीरही केले आहे. त्यामुळे ऑनलाईन पूजाविधीसाठी भाविक अद्यापही सदर बनावट अॅपचा वापर मोठ्याप्रमाणात करत आहेत. या बनावट अॅपची निर्मिती देवस्थान मधील काही कर्मचाऱ्यांनी केली आहे. या प्रकरणामध्ये देवस्थानातील कर्मचारी व वरिष्ठ अधिकारी वर्ग सामील असा आरोपही सुरपुरिया यांनी केला आहे.
या बनावट ॲपचे सदस्य सुमारे २ ते ३ लाखांपेक्षा जास्त आहेत. त्याद्वारे शनिभक्तांकडुन आकारली जाणारी प्रती पूजा व तेल अर्पण सेवे पोटीची रक्कम गृहित धरल्यास कमीत कमी ४०० ते ५०० कोटी रुपयांची लूट या बोगस ॲपद्वारे झाल्याचे दिसून येते. ही बनावट ॲप अद्यापही सुरु असल्याने भोळ्या भाबड्या शनिभक्तांची लूटमार सुरूच आहे. त्यामुळे शनैश्वर देवस्थानच्या नावाने खोटे व बोगस ॲपची निर्मिती करुन आर्थिक लूट व अपहार झाल्याबाबत देवस्थानची, देवस्थानामधील सर्व कर्मचारी व सर्व वरिष्ठ अधिका-यांची सखोल चैाकशी करावी. तसेच सर्वांच्या संपत्तीची व मालमत्तेचीही चैाकशी करुन संबंधित ॲप निर्मितीमध्ये दोषी आढळलेल्या व्यक्तींविरुद्ध योग्य ती कायदेशीर कारवाई करुन संबंधितांना कठोर शासन करावे, अशी मागणीही करण्यात आली आसुन पोलीस तपासात काय सत्य बाहेर येते या कडे आता सर्वांचे लक्ष लागले आहे.
