भरधाव जीप थेट हॉटेल मध्ये घुसली चहा पिणाऱ्या पाच मित्रांना उडवले दोघांचा मृत्यू, तीन जण जखमी

भरधाव जीप थेट हॉटेल मध्ये घुसली चहा पिणाऱ्या पाच मित्रांना उडवले दोघांचा मृत्यू, तीन जण जखमी

लातूर (प्रतिनिधी)

    विवाहासाठी पुण्याहून लातूरला निघालेल्या वाहन चालकाचा ताबा सुटल्याने हॉटेलमध्ये घुसलेल्या जीप मुळे तेव्हा चहा पीत बसलेल्या पाच जणांना जोराची धडक बसली त्यात एकाचा जागेवर तर एकाचा उपचारा दरम्यान मृत्यू झाल्याची घटना टेंभूर्णी-लातूर मार्गावरील मुरुड बायपास जवळ घडली असून मुरुड व परिसरात हळहळ व्यक्त होत आहे.

    पुणे जिल्ह्यातील चिखली येथील जगताप कुटुंबीय नातेवाइकांच्या विवाह समारंभासाठी रविवारी लातूरला जीप (एमएच १२, पीसी ३७४०) मधून निघाले होते. त्यात चालक कल्पेश जगताप, अशोक जगताप व रंजना जगताप होते. दरम्यान, ही जीप टेंभूर्णी-लातूर मार्गावरील मुरुड बायपास जवळ पोहोचली असता चालकाचा वाहनावरील ताबा सुटला आणि जीप थेट हॉटेलमध्ये घुसली. तेव्हा तेजस मुंदडा, सूरज युवराज घुटे, आदित्य माळी, विवेक चांडक, दशरथ हिंगले (सर्वजण रा. मुरुड) हे चहा पीत बसले होते. जीपच्या अपघातात हे सर्वजण जखमी झाले. त्यातील तेजस पवन मुंदडा यांचा जागीच मृत्यू झाला होता. तसेच सुरज घुटे हा गंभीर जखमी झाल्याने त्यास लातूर येथील खासगी रुग्णालयात उपचारासाठी दाखल करण्यात आले होते. दरम्यान आज दुपारी चार वाजेच्या सुमारास त्याची प्राणज्योत मालवली. सुरज घुटे हा मुरुड येथील अडत व्यापाऱ्याचा एकुलता एक मुलगा असल्याने त्याचा उपचारा दरम्यान मृत्यू झाल्याची बातमी समजताच घरच्यांनी आक्रोश केला असून सर्वत्र हळहळ व्यक्त होत आहे.