शिक्षणाचं साहित्य न मिळाल्याने 16 वर्षाच्या ओमकारने झाडाला गळफास लावला, लेकाचा गळफास पाहून बापानेही त्याच फांदीला लटकून जीवनयात्रा संपवली

नांदेड (प्रतिनिधी)

   एकीकडे राज्यातील गिधाडांनी वाममार्गाने मिळवलेली संपत्ती दडवता दडवता झालेली प्रशासनाची होणारी दमछाक आणि दुसरीकडे शिक्षणाच साहित्य न मिळाल्याने 16 वर्षाच्या ओमकारने संपवलेली जीवन यात्रा आणि लेकाच्या गळ्याचा फास पाहून बापानेही घेतलेला गळफास हे विदारक चित्र केवळ अंगावर शहारे आणणारे नाही तर संताप व्यक्त करणारे आहे.

    या ह्रदय पिळवून टाकणाऱ्या घटने विषयी प्राप्त माहिती अशी की, नांदेड जिल्ह्यातील बिलोली तालुक्या असलेल्या मिनकी येथील रहिवासी असलेला आणि लातूर जिल्ह्यातील उदगीर येथील एका शाळेत दहावी वर्गात शिकणारा ओमकार लक्षण पैलवार नावाचा 16 वर्षाचा मुलगा संक्रांत निमित्त आपल्या गावी (मिनकी) येथे आला. घरी येऊन त्याने सणानिमित्त नवीन कपडे आणि शिक्षणाचे साहित्य घेऊन देण्याची वडिलांकडे मागणी केला. वडील अल्पभूधारक शेतकरी राजेंद्र पैलवार यांनी सध्या आपल्याकडे पैसे नाहीत, पैसे आले की तुला नवीन कपडे आणि पुस्तक वह्या घेऊन देईन असे सांगितले.

पण मुलाच्या मनात कसले विचार आले त्यालाच ठाऊक. तो सकाळी उठला, सरळ शेतात गेला आणि शेतातील झाडाला गळफास लावून त्याने स्वतःला तिथेच संपवून घेतला..

    मुलगा (ओमकार) घरी आला नाही म्हणून आई वडील भाऊ सर्वांनी शोध घ्यायला सुरुवात केली. शोधत शोधत वडील शेताकडे आले, पाहतो तर मुलगा झाडाच्या फांदीवर लटकत होता. मुलगा फाशी घेतल्याची कसलीच माहिती घरच्यांना न देता वडील लगेच झाडावर चढले, मृतदेहाला अलगद खाली सोडून, त्याला जागेवर झोपवले आणि मुलाने ज्या दोरीने फाशी घेतली त्याच दोरीने त्याच झाडावर, त्याच फांदीला, त्याच क्षणी त्यांनीही फाशी घेऊन त्याच झाडाखाली स्वतःचे जीवन संपवले.

अशा या काळीज पिळवटून टाकणाऱ्या व वेदनादायक घटनेने सर्वत्र हळहळ व्यक्त होत आहे.