भावकीच्या भांडणात मध्यरात्री पडला रक्ताचा सडा, तिघांचा मृत्यू, 4 जण गंभीर जखमी
भावकीच्या भांडणात मध्यरात्री पडला रक्ताचा सडा, तिघांचा मृत्यू, 4 जण गंभीर जखमी
धाराशिव (प्रतिनिधी)
भावकीच्या वादातून झालेल्या हाणामारीत तीन जणांचा जागीच मृत्यू तर अन्य चार जण गंभीर जखमी झाल्याची धक्कादायक घटना धाराशिव जिल्ह्याच्या येरमाळा पोलीस ठाण्याच्या हद्दी मधील बावी या ठिकाणी घडली. याप्रकरणी येरमाळा पोलीस ठाण्यात गुन्हा दाखल केला आसून या घटनेचा पुढील तपास पोलीस करत आहेत.
या विषयी प्राप्त माहिती अशी की, धाराशिव जिल्ह्याच्या वाशी तालुक्यातील बावी गावात रविवारी मध्यरात्री पारधी समाजाच्या 2 गटात हाणामारी झाली. हे दोन्ही कुटुंब एकमेकांचे नातेवाईक आसून मागील काही दिवसांपासून या कुटुंबातील चुलत भावांमध्ये शेतात पाणी देण्यावरून वाद सुरू होता. रविवारी हा वाद विकोपाला गेल्यानंतर दोन गटात तुंबळ हाणामारी झाली. ज्यात तीन जणांचा मृत्यू झाला आहे. मृतांमध्ये एका गटातील दोन तर दुसऱ्या गटातील एकजणाचा समावेश आहे. मृत सुनील काळे आणि परमेश्वर काळे हे बापलेक होते.
आप्पा काळे, सुनील काळे आणि परमेश्वर काळे असं मयत झालेल्या तिघांची नावं आसून सुनील काळे आणि परमेश्वर काळे हे बापलेक आहेत. या हाणामारीत तीन पुरुषांसह एक महिला गंभीर जखमी आहे. महिलेची प्रकृती चिंताजनक असल्याची माहिती आहे. या प्रकरणी येरमाळा पोलीस ठाण्यात गुन्हा दाखल करण्यात आला आहे. घटनेची माहिती मिळताच पोलिसांनी घटनास्थळी जाऊन पंचनामा केला आहे. पोलिसांनी संशयित आरोपींना ताब्यात घेतलं असून पुढील तपास सुरू असल्याची माहिती येरमाळा पोलीस स्टेशनचे पोलीस निरीक्षक महेश क्षिरसागर यांनी दिली आहे.
