रुग्णांना निष्क्रिय व बनावट औषधीचा पुरवठा  करणाऱ्या सर्व संबंधितावर कठोर कार्यवाही करावी आ नमिता अक्षय मुंदडा यांची मुख्यमंत्री ना.श्री. देवेंद्रजी फडणवीस यांच्याकडे मागणी

अंबाजोगाई (प्रतिनिधी)

   स्वा. रा. ती. प्रा. शा. वै. महाविद्यालय व रुग्णालय, अंबाजोगाई. येथे रुग्णांना निष्क्रिय व बनावट औषधीचा पुरवठा  करणाऱ्या सर्व संबंधितावर कठोर कार्यवाही करावी अशी मागणी आ नमिता अक्षय मुंदडा यांनी मा.ना.श्री. देवेंद्रजी फडणवीस साहेब, मुख्यमंत्री, महाराष्ट्र राज्य यांच्या कडे केली आहे.

    या संदर्भात देण्यात आलेल्या निवेदनात आ नमिता मुंदडा यांनी म्हंटले आहे की, स्वामी रामानंद तीर्थ ग्रामीण शासकीय वैद्यकीय महाविद्यालय व रुग्णालय, अंबाजोगाई, जि. बीड. येथे सतत मंजूर खाटांच्या दुप्पट रुग्ण दाखल असतात तर बाह्यरुग्ण विभागत दररोज २००० पेक्षा जास्त रुग्णांची सेवा केली जाते, खाजगी रुग्णालयातून मिळणाऱ्या महागड्या उपचारपद्धतीमुळे सर्वसामान्य रुग्ण स्वस्त आणि खात्रीपूर्वक उपचारासाठी सदर रुग्णालयाला प्राधान्य देतात एका अर्थाने गरीब रुग्णांसाठी संजीवनी ठरलेले सदर रुग्णालय आहे.

   मात्र सदर रुग्णालयात रुग्णांना निष्क्रिय व बनावट औषधींचा पुरवठा करण्यात आल्याची धक्कादायक घटना अन्न व औषध प्रशासनाच्या तपासणीत उघडकीस आली आहे. याप्रकरणी ठाणे, भिवंडी, कोल्हापूर आणि सुरत (गुजरात) मधील चौघांवर अन्न व औषध प्रशासनाचे निरीक्षक यांच्या फिर्यादीवरून अंबाजोगाई शहर पोलीस स्टेशन येथे गुन्हा दाखल करण्यात आला आहे. हि अतिशय गंभीर बाब आहे.

   सदर बनावट औषध निर्मिती आणि विक्रीच्या मागे आंतरराज्यीय टोळी असून अनेक राज्यात त्यांचे जाळे पसरले असण्याची शक्यता फिर्यादीत व्यक्त करण्यात आली आहे. राज्यात रुग्णालयांना शासनाच्या वैद्यकीय शिक्षण व संशोधन विभागाच्या वतीने औषधी पुरवठा करण्यात येत असल्याचे समजते, अंबाजोगाई येथील रुग्णालयात बनावटीचा प्रकार समोर आला असला तरी असे प्रकार संबंधित औषध पुरवठा धारकाकडून राज्यात ठीकठिकाणी घडले असण्याची शक्यता आहे. त्यामुळे अंबाजोगाई नेमक्या कोणत्या ई-निविदेद्वारे हे औषधी मागवण्यात आली होती? या औषधांची निर्मिती कोठे झाली? त्यासाठी लागणारा कच्चा माल, पॅकींग मटेरियल हे साहित्य कोठून आले? अश्या बनावट औषधांचा कोठे कोठे विक्री व पुरवठा झाला याचा स्वतंत्र तपास करून संबंधित दोषीवर राज्यभर गुन्हे दाखल करणे अत्यंत गरजेचे आहे.

   हा प्रकार अतिशय गंभीर आहे. त्यामुळे या प्रकरणी राज्यभर तातडीने चौकशी करून गोर गरीब रुग्णाच्या जीविताशी खेळणाऱ्या सर्व संबधित दोषीवर कठोर कार्यवाही करण्यात यावी अशी मागणी आ नमिता मुंदडा यांनी या निवेदनात केली आहे.