*केज मतदार संघात एकाकी पडलेल्या माजी आ पृथ्वीराज साठे यांना प्रा संगीता ठोंबरे यांच्या निवडणुकी मधील माघारी मुळे बळकटी मिळालेली असतानाच आता 7 नोव्हेंबर रोजी राजकीशोर मोदीही हाती तुतारी घेऊन मैदानात उतरणार*
अंबाजोगाई (प्रतिनिधी)
केज मतदार संघातील राष्ट्रवादी काँग्रेस शरदचंद्र पवार गटाचे उमेदवार माजी आ पृथ्वीराज साठे यांना उमेदवारी जाहीर झाल्या पासून ते एकाकी पडल्याचे चित्र दिसत असतानाच आज उमेदवारी मागे घेण्याच्या शेवटच्या दिवशी अपक्ष उमेदवार प्रा संगीता ठोंबरे यांनी आपला उमेदवारी अर्ज मागे घेऊन पृथ्वीराज साठे यांना जाहीर पाठिंबा दिल्याने साठे यांना बळकटी मिळाली असतानाच आता अजित पवार गटाचे माजी नगराध्यक्ष राजकिशोर पापा मोदी 7 नोव्हेंबर पासून तुतारी हातात घेऊन साठे यांच्या साठी खुले आम मैदानात उतरणार आहेत.
केज मतदार संघातून राष्ट्रवादी काँग्रेस शरदचंद्र पवार गटाकडून निवडणूक लढवण्यास 12 जण इच्छुक असताना पवार साहेबांना संकट समयी साथ दिल्या मुळे निष्ठेचे फळ म्हणून पक्षाने केज मतदार संघाची उमेदवारी दिली. साठे यांच्या समोर विद्यमान आमदार सौ नमिता मुंदडा यांचे कडवे आव्हान व मुंदडा यांची प्रचार यंत्रणा अतिशय शिस्तबद्ध रित्या राबवली जात असताना आणि निवडणूक रिंगणात माजी आ संगीता ठोंबरे यांनी अपक्ष उमेदवारी दाखल केल्याने पृथ्वीराज साठे हे एकाकी पडल्याचे दिसून येत होते.
मात्र आज उमेदवारी अर्ज मागे घेण्यासाठी अवघा काही मिनिटांचा कालावधी शिल्लक राहिला असतानाच राष्ट्रवादी काँग्रेस शरदचंद्र पवार गटाच्या नेत्या खा सुप्रिया ताई सुळे व बीडचे खा बजरंग सोनवणे यांच्या शिष्टाईने केज मतदार संघातील प्रबळ अपक्ष उमेदवार माजी आमदार प्रा. सौ. संगीता ठोंबरे यांनी आपला उमेदवारी अर्ज मागे घेतल्या मुळे केज मतदार संघात राष्ट्रवादी काँग्रेस शरदचंद्र पवार गटाचे उमेदवार माजी आ पृथ्वीराज साठे यांना बळकटी मिळाली.
केज मतदार संघात मुंदडा व राजकीशोर मोदी यांचे असलेले राजकीय वैमनस्य सर्व परिचित असल्याने महायुतीच्या घटक पक्षात असलेले अजित पवार गटाचे माजी नगराध्यक्ष राजकिशोर पापा मोदी हे साठे यांच्या साठी धावून आले असून 7 नोव्हेंबर पासून पापा मोदी हे हाती तुतारी घेऊन खुले आम मैदानात उतरणार आहेत.
