*चक्रव्यूव्हात सापडलेल्या मनोज जरांगे यांची अखेर निवडणुकी मधून माघार, गुडघ्याला बाशिंग बांधून असलेल्या सर्वच उमेदवारांचा या निर्णयाने झाला भ्रम निरास*

अंबाजोगाई (प्रतिनिधी)

      चक्रव्यूव्हात सापडलेले मराठा संघर्ष योद्धे मनोज जरांगे यांनी अखेर राज्यात एकाही मतदार संघात उमेदवार द्यायचा नाही अशी निर्णायक भूमिका घेऊन विधानसभा निवडणुकी मधून माघार घेतली असून गुडघ्याला बाशिंग बांधून असलेल्या सर्वच उमेदवारांचा मात्र या निर्णयाने भ्रम निरास झाला आहे

      मागील एक वर्षा पासून मराठा समाजाला ओबीसी मधून आरक्षण मिळावे या साठी मनोज जरांगे यांच्या नेतृत्वाखाली राज्य भरात सुरू असलेले आंदोलन, या आंदोलनातुन एकवटलेला मराठा समाज आणि 4 महिन्या पूर्वी झालेल्या लोकसभा निवडणुकीत जरांगे फॅक्टरने दाखवलेला चमत्कार यामुळे राज्यात महाविकास आघाडी कडे मतदारांचेच नव्हे तर विधान सभा निवडणूक लढवणाऱ्या इच्छुकांचे आकर्षण मोठ्या प्रमाणावर वाढले. नुकत्याच राज्यभर वाहू लागलेल्या विधानसभेच्या वाऱ्यात मराठा समाजाची भूमिका ही निर्णयायक ठरणार हे सत्य कोणीही नाकारू शकत नाही. लोकसभेला ज्या प्रमाणे जनतेने नेत्यांच्या शब्दाला काडीचीही किंमत न देता आपण काय करू शकतो हे दाखवून दिले. तीच परिस्थिती आजही विधान सभेच्या पार्श्वभूमीवर सर्व राज्यभरात दिसून येत आहे. विधानसभा निवडणूकीतील उमेदवारी अर्ज दाखल झाले यात मनोज जरांगे यांच्या आदेशानुसार बहुतांश मतदार संघात आमदारकी साठी इच्छुकानी अपक्ष उमेदवाऱ्या दाखल केल्या. त्या नंतर अंतरवली सराटी मध्ये जरांगे यांच्या सोबत दलित व मुस्लिम नेत्यांच्या बैठका झाल्या आणि यातून मराठा, दलित व मुस्लिम मतांचे एकत्रीकरण करण्यासाठी एम डी एम फॅक्टर उदयास आला. या बैठकीत ठरल्या प्रमाणे मनोज जरांगे यांनी 4 नोव्हेंबर ही उमेदवारी अर्ज मागे घेण्याची शेवटची तारीख असल्याने काल 3 नोव्हेंम्बर रोजी कोणत्या मतदार संघात कोणत्या उमेदवाराला पाठिंबा द्यायचा, कोणत्या उमेदवाराला पाडायचे या बाबत एम डी एम फॅक्टर ला सूचित करणार होते. त्यामुळे जवळपास सर्वच मतदार संघातील महायुती वगळता अन्य सर्व उमेदवार जरांगे यांच्या सोबत बैठका घेऊन आदेशा कडे कान लावून होते.

    ठरल्या प्रमाणे अंतरवली सराटी मंध्ये उमेदवारी साठी गुडघ्याला बाशिंग बांधून असलेल्या कार्यकर्त्या सह हजारोच्या उपस्थिती मध्ये जरांगे पाटील यांनी उपस्थिता सोबत संवाद साधला, आपले उमेदवार द्यायचे म्हणून मोजक्या मतदार संघाच्या नावाची घोषणा केली. मात्र करण्यात आलेली घोषणा आणि उमेदवारांच्या नावाचा स्पष्ट उल्लेख न झाल्याने अनेकांचा कालच भ्रम निरास झाला असताना सर्व पर्यायाची पडताळणी करून चक्रव्यूव्हात सापडल्या मनोज जरांगे यांनी आज सकाळी पत्रकार परिषद घेऊन राज्यात एकाही मतदार संघात उमेदवार द्यायचा नाही अशी निर्णायक भूमिका घेऊन विधानसभा निवडणुकी मधून एक प्रकारे माघार घेतली असून गुडघ्याला बाशिंग बांधून असलेल्या व सातत्याने अंतरवली सराटी मध्ये वाऱ्या करणाऱ्या आणि मागील 3-4 दिवसा पासून त्या ठिकाणी तळ ठोकून असलेल्या सर्वच उमेदवारांचा मात्र या निर्णयाने भ्रम निरास झाला आसून आज पर्यंत मोठ्या संख्येने मनोज जरांगे यांच्या पाठीशी खंबीरपणे उभा असलेले व त्यांच्या निर्णयाकडे कान लावून बसलेले उमेदवार आज उमेदवारी अर्ज मागे घेण्याचा शेवटचा दिवस असल्याने काय भूमिका घेतात याचे चित्र संध्याकाळी स्पष्ट होईल तर संपूर्ण मराठा समाज

मतदान रुपी आशीर्वाद कोणत्या उमेदवाराच्या पारड्या मध्ये टाकतात

याचे चित्र 23 नोव्हेंबर ला स्पष्ट होईल.