माजी आ. संगीता ठोंबरे यांची उमेदवारी कोणासाठी डोकेदुखी ठरणार ?  उमेदवारी कायम राहिल्यास केज मतदार संघात होणार तिरंगी लढत

अंबाजोगाई (प्रतिनिधी)

     केज मतदार संघातून भाजपाच्या आ नमिता मुंदडा, रा कॉ शरदचंद्र पवार गटाचे पृथ्वीराज साठे यांच्या सह अपक्ष म्हणून निवडणूक लढवणाऱ्या माजी आ. संगीता ठोंबरे यांनी आज आपला उमेदवारी अर्ज दाखल करत असून ही उमेदवारी कायम राहिल्यास कोणासाठी डोकेदुखी ठरणार या कडे मतदार संघाचे लक्ष लागून राहिले आहे.

     विधानसभा निवडणुकीतील उमेदवारी अर्ज दाखल करण्यासाठी केवळ 2 दिवस बाकी असून केज राखीव विधानसभा मतदार संघातून भाजप महायुतीने विद्यमान आ सौ नमिता अक्षय मुंदडा यांना उमेदवारी दिली असून महाविकास आघाडी तर्फे राष्ट्रवादी काँग्रेस शरदचंद्र पवार गटा कडुन पक्षाचे एकनिष्ठ कार्यकर्ते माजी आ पृथ्वीराज साठे यांना उमेदवारी दिली आहे. या मतदार संघातुन निवडणूक लढवण्यास इच्छुक असलेल्या माजी आ संगीता ठोंबरे यांनी उमेदवारी साठी सर्व प्रथम भाजपाची व त्या नंतर राष्ट्रवादी कांग्रेस शरदचंद्र पवार गटाची दारे ठोठावली. मात्र दोन्ही ठिकाणी त्यांना उमेदवारी न मिळाल्याने अखेर त्यांनी अपक्ष म्हणून रिंगणात उतरण्याचा निर्णय घेतला असून आज त्या आपला उमेदवारी अर्ज दाखल करणार आहेत.

     निवडणूक रिंगणात उतरलेल्या आ नमिता मुंदडा यांच्या कडे मागील 5 वर्षात केलेल्या विकास कामाची शिदोरी आहे तर आ साठे यांच्या कडे खा शरदचंद्र पवार यांची खंबीर साथ आण रस्त्यावरील एक सामान्य कार्यकर्ता म्हणून वेगळी ओळख आहे. निवडणूक रिंगणात उतरलेल्या सौ संगीता ठोंबरे या पूर्वी 5 वर्ष आमदार राहिल्या मुळे त्यांच्याकडे ही कार्यकर्त्यांची फळी असून भाजप सह रा कॉ बजरंग सोनवणे यांचेही काही कार्यकर्ते त्यांच्या सोबतीला आहेत. अपक्ष म्हणून त्यांची उमेदवारी कायम राहिली तर केज मतदार संघात तिरंगी लढत होणार यात तीळमात्र ही शंका नसून संगीता ठोंबरे यांची ही उमेदवारी कोणासाठी डोकेदुखी ठरणार या कडे सर्व मतदार संघाचे लक्ष लागले आहे.