“अभि नही तो कभी नही” म्हणत रमेश आडसकर यांचा अखेर रा कॉ शरदचंद्र पवार गटात प्रवेश, तुतारी हाती घेऊन माजलगांव मतदार संघावर डाव लावणार*
अंबाजोगाई (प्रतिनिधी)
मागील 15 वर्षा पासून आमदारकीचे स्वप्न पाहणारे आंबा साखर कारखान्याचे चेअरमन रमेशराव आडसकर यांनी अखेर आज राष्ट्रवादी काँग्रेस शरदचंद्र पवार गटात प्रवेश करून तुतारी हातात घेतली असून आता ते माजलगांव मतदार संघा मधून आमदारकीसाठी डाव लावणार आहेत. भाजपचे दिवंगत नेते गोपीनाथ मुंडे यांनी बीड जिल्ह्यात अनेक नेते तयार केले. मात्र त्या वेळी सत्तेसाठी ते सर्व नेते राष्ट्रवादी काँग्रेसमध्ये सामील झाले होते. महायुतीची सत्ता येणार असे दिसू लागताच याच नेत्यांनी पुन्हा भाजपात येण्याचा प्रवास सुरू केला या प्रवासा मधील एक प्रवासी होते रमेश आडसकर.
राष्ट्रवादी काँग्रेसचे नेते खा शरदचंद्रजी पवार यांच्या आदेशावरून सन 2009 साली गोपीनाथ मुंडेंच्या विरोधात आडसकर यांनी राष्ट्रवादी काँग्रेस कडुन लोकसभा निवडणूक लढविली होती. अपेक्षेप्रमाणे मुंडेंनी 1 लाख 40 हजार मतांनी विजयश्री खेचून आणली होती. त्याच आडसकरांनी महायुतीची सत्ता येण्याची शक्यता दिसू लागताच भाजपवासी होण्याचा निर्णय घेतला आणि आमदार पंकजा मुंडे यांच्या उपस्थितीत आडसकर यांनी त्यावेळी औरंगाबादमध्ये प्रवेश केला.
रमेश आडसकर हे बीड जिल्ह्यातील केज विधानसभा मतदारसंघातील रहिवासी असलेले नेते आहेत. सध्या ही जागा अनुसूचित जातीसाठी आरक्षित आहे. केज मतदार संघावर पकड असलेल्या मुंदडा परिवाराचे आणि अडसकरांचे गेल्या 20 वर्षात कधीच जमले नाही. त्यामुळे केज मतदार संघात कोणतेही राजकीय भविष्य नसल्याने आडसकर यांनी माजलगांव मतदार संघाचे आमदार होण्याचे स्वप्न समोर ठेऊन मागील 10 वर्षा पासून माजलगाव मतदार संघात आपली मोर्चे बांधणी सुरू केली.
मागील 2019 च्या विधानसभा निवडणुकी मध्ये माजलगाव मतदार संघातून आडसकरांनी भाजपा कडुन राष्ट्रवादी काँग्रेसचे प्रकाश दादा सोळंके यांच्या विरोधात निवडणूक लढवली मात्र याही ठिकाणी त्यांना अपयश पदरात पडले त्यांना जवळपास 13 हजार मतांनी पराभव पत्करावा लागला. दरम्यानच्या काळात आडसकरांना विधान परिषदेवर आमदार होण्याची संधी मिळेल असा कयास मानला जात होता मात्र यातही त्याना गुलालाचे योग जुळून आले नाहीत.
लोकसभा, विधानसभा निवडणुकी मध्ये पराभव होऊन ही रमेश आडसकर खचून गेले नाहीत. त्यांनी जिद्द कायम ठेवून माजलगाव मतदार संघात सतत संपर्क ठेऊन मतदार संघांची नाळ काही तुटू दिली नाही यामुळेच आज ही या मतदार संघात भाजप म्हणून नव्हे तर रमेश आडसकर म्हणून त्यांची क्रेज कायमच आहे हे नाकारून चालणार नाही.
सन 2019 मध्ये राज्यात महाविकास आघाडीचे सरकार सत्तेवर आले. हे सरकार अडीच वर्षे सत्तेवर राहिले आणि मागील अडीच वर्षात महाराष्ट्रात घडलेल्या राजकीय घडामोडी, शिवसेना व राष्ट्रवादी काँग्रेस मध्ये पडलेले 2 गट यातून उदयाला आलेले किळसवाणे राजकारण आणि यातून राहुल गांधी, शरदचंद्र पवार, उद्धव ठाकरे या महाविकास आघाडीच्या नेत्याला मिळालेली सहानभूती व यामुळेच लोकसभा निवडणुकीत महाविकास आघाडीला मिळालेले यश संपूर्ण देशाने पाहिले.
याचाच दुसरा अंक विधानसभा निवडणुकीच्या माध्यमातून आता राज्य आणि देश पाहनार असुन विधानसभेच्या तोंडावर महाविकास आघाडी मधील घटक पक्ष असलेल्या राष्ट्रवादी काँग्रेस शरदचंद्र पवार गटाकडे राज्य भरातील सर्वच मतदार संघा मधून उमेदवारी मागण्यांसाठी इच्छुकांची इनकमिंग मोठ्या प्रमानावर दिसते आहे. लोकसभा निवडणूक निकाला वरून बीड जिल्ह्यातील माजलगांव मतदार संघात ही राष्ट्रवादी काँग्रेसला तसे पोषकच वातावरण आहे मात्र हे कॅश करणारा उमेदवार हवा आहे आणि तो रमेश आडसकरांच्या रूपाने मतदार संघाला दिसतो आहे.
खर तर लोकसभा निवडणुकी मधेच रमेश आडसकरांना खासदार होण्याची संधी चालून आली होती. राज्यात जरांगे फॅक्टरने जोर धरलेला होता आणि वातावरण भाजप विरोधी असल्याने
रमेश आडसकरांनी हवेचा झोक पाहून तात्काळ निर्णय घेऊन राष्ट्रवादी काँग्रेस शरद पवार गटात प्रवेश केला असता तर आज बीडच्या खासदरकीची लॉटरी आडसकरांना लागली असती. मात्र नशिबात राजयोग असल्या शिवाय कुठलीच संधी चालून येत नाही म्हणतात ते कदाचित खर ही असेल.
मागील 15 वर्षा पासून आमदारकीचे स्वप्न पाहणाऱ्या रमेशराव आडसकराना येणाऱ्या विधानसभा निवडणुकी मध्ये राजयोग दिसून येत आहेत. आडसकर पुन्हा एकदा माजलगांव मतदार संघा मधून आमदारकीसाठी डाव लावणार हे आता निश्चित आसून राज्यातील सत्तेच्या खिचडी मुळे माजलगांव मतदार संघ महायुतीच्या तडजोडी मध्ये पुन्हा राष्ट्रवादी काँग्रेस अजित पवार गटाकडे राहिला
“झुंजार न्यूज” ने 29 सप्टेंबर रोजीच माजलगाव मतदार संघाची राजकीय परिस्थिती पाहून रमेश आडसकर यांनी तुतारी हातात घ्यावी हे सुचित केले होते. अखेर मागील 5 वर्षात लावलेल्या नियोजनाच्या व जनसंपर्काच्या ताकतीवर आमदारकीच स्वप्न आणि “अभि नही तो कभी नही” असं म्हणत आज राष्ट्रवादी काँग्रेस शरदचंद्र पवार गटात प्रवेश करून तुतारी हातात घेतली असून आता ते माजलगांव मतदार संघा मधून आमदारकीसाठी डाव लावणार आहेत.
