रुग्ण तपासण्यासाठी डॉक्टरला घरी बोलावले, विवाहितेने त्यांचेच कपडे उतरवले, नवऱ्याने व्हिडिओ काढला, 5 लाखाची केली मागणी
रुग्ण तपासण्यासाठी डॉक्टरला घरी बोलावले, विवाहितेने त्यांचेच कपडे उतरवले, नवऱ्याने व्हिडिओ काढला, 5 लाखाची केली मागणी
छ. संभाजीनगर
“हॅलो, घरी पेशंट आहे, पण त्याला चालता येत नाही. तुम्ही उपचारासाठी घरी या” असं सांगून डॉक्टरांना घरी बोलावलं. पेशंट बेडरुममध्ये आहे, असं खोटं सांगून खोलीत नेलं. त्यानंतर बाहेरुन दार लावले. शेवटी महिलेने डॉक्टरचा शर्ट पॅन्ट काढले आणि आरडाओरड केली. त्यामुळे पतीने आत येऊन डॉक्टर आणि महिलेचा व्हिडिओ शूट केला. पाच लाख रुपये दे, अन्यथा व्हिडिओ व्हायरल करू अशी धमकी डॉक्टरला दिल्याप्रकरणी हर्सूल पोलीस ठाण्यात गुन्हा दाखल करण्यात आला आहे.
सांडू लहाने, शकुंतला सांडू लहाने, स्वप्निल लहाने, शकुंतलाची मुलगी, जावई इत्यादींचा आरोपींमध्ये समावेश आहे. तर डॉक्टर दीपक दिनकर वानखेडे वय 50, रा. लोणी बोडखा तालुका खुलताबाद असे फिर्यादीचे नाव आहे.
बुधवारी सकाळी सव्वा दहा वाजताच्या सुमारास डॉ. दीपक वानखेडे यांना कॉल आला. घरी पेशंट असून त्याला चालता येत नाही. तुम्ही आयुर्वेदिक उपचारासाठी घरी या असं सांगून घरी बोलावले. डॉक्टर वानखेडे सहकारी रोहिणी हिला घेऊन हर्सूल येथील घरी आले.
हरसिद्ध माता मंदिरासमोर रोहिणीला उभे करून वानखेडे घरात गेले. यावेळी सांडू लहाने यांनी पेशंट बेडरूममध्ये असं सांगून वानखेडे यांना आत पाठवले. त्यानंतर बेडरूमचा दरवाजा बाहेरून लावून घेतला. बेडरूममध्ये शकुंतला होती. काही कळण्याच्या आत डॉक्टरांसोबत झटापट करून तिने त्यांचे शर्ट पॅन्ट काढले अन् पतीला आवाज दिला.
सांडू याने दार उघडून व्हिडिओ शूटिंग सुरू केलं. वानखेडे विनवणी करत असताना आरोपी ऐकण्याच्या मनस्थितीत नव्हता. त्यानंतर लहानेचा मुलगा, मुलगी, जावईही आले. त्यांनी डॉक्टरला शिवीगाळ केली. पाच लाख रुपये दे अन्यथा तुझा व्हिडिओ व्हायरल करु, अशी धमकी दिल्याचा आरोप आहे.
डॉक्टर दीपक वानखेडे यांनी सोबत 78 हजार रुपये आणले होते. सर्वांनी मिळून धमकी दिल्याने वानखेडे प्रचंड घाबरले. त्यांनी डॉक्टरांकडे असलेले 78 हजार रुपये काढून घेतले त्यानंतर फोनपे नंबरवर मित्राकडून पैसे मागवून शकुंतलाने दिलेल्या नंबरवर फोन पे केले. उर्वरित पैसे उद्यापर्यंत आणून द्या अन्यथा तुला आणि तुझ्या कुटुंबाला जीवे मारू, अशी धमकी दिली. या प्रकरणी हर्सूल पोलीस ठाण्यात गुन्हा दाखल करण्यात आला आहे.
