इर्टीगा कार मध्ये सीएनजी गॅसचा स्फोट, होरपळून पोलीस आणि व्यावसायिकाचा मृत्यू
इर्टीगा कार मध्ये सीएनजी गॅसचा स्फोट, होरपळून पोलीस आणि व्यावसायिकाचा मृत्यू
जामखेड (प्रतिनिधी)
सीएनजी गॅसच्या स्फोटामुळे कारमधील एक पोलिस कर्मचारी व एका व्यावसायिकाचा होरपळून मृत्यू झाल्याची दुर्देवी घटना आज पहाटे जामखेड मध्ये घडली.
आज २४ फेब्रुवारी रोजी पहाटे चारच्या सुमारास जामखेड शहरातील बीड रोडवर, नवले पेट्रोल पंपाच्या जवळ, इर्टीगा कार रस्त्याच्या दुभाजकाला धडकली आणि नंतर कारने पेट घेतला. सीएनजी गॅसच्या स्फोटामुळे वाहनाने आगीच्या ज्वाळा पकडल्या. कारमधील एक पोलिस कर्मचारी व एका व्यावसायिकाचा होरपळून मृत्यू झाला.
घटनेची माहिती मिळताच पोलीस निरीक्षक महेश पाटील आपल्या सहकाऱ्यांसह तातडीने घटनास्थळी पोहोचले. सामाजिक कार्यकर्ते संजय कोठारी यांनीही घटनास्थळी धाव घेतली. जामखेड नगरपरिषदेच्या अग्निशमन दलातील आय्यास शेख, विजय पवार, अहमद शेख यांनी आग आटोक्यात आणण्यासाठी तब्बल एक तास प्रयत्न केले. मात्र, तोपर्यंत संपूर्ण कार जळून खाक झाली होती.
या दुर्घटनेत जामखेड पोलीस ठाण्यातील कर्मचारी गुडवाल आणि जामखेडमधील साईनाथ पॉन शॉपचे व्यापारी महादेव काळे यांचा समावेश असल्याचे समजते.
कारचा जोरदार अपघात झाल्याने टायर १००-१५० फूट दूर फेकला गेला. इर्टीगा गाडीची अत्याधुनिक रचना असल्याने ती लॉक झाली आणि त्यामुळे कारमधील व्यक्तींना बाहेर पडणे शक्य झाले नाही. या भयंकर आगीत दोघेही पूर्णतः होरपळल्यामुळे त्यांची ओळख पटवणे कठीण झाले आहे. या दुर्घटनेबाबत जामखेड पोलीस निरीक्षक महेश पाटील यांच्या मार्गदर्शनाखाली पुढील तपास सुरू आहे.
