अंबाजोगाई व परिसरात बिबट्याच्या हल्ल्याच्या अफवा दिवसेंदिवस वाढु लागल्या
अंबाजोगाई व परिसरात बिबट्याच्या हल्ल्याच्या अफवा दिवसेंदिवस वाढु लागल्या
कुंबेफळ हरणाचा फडशा मोकाट कुत्र्याने पाडल्याची वनपाल विजया शिंगाटे यांची माहिती
अंबाजोगाई- (प्रतिनिधी)
अंबाजोगाई व परिसरात बिबट्याच्या हल्ल्याच्या अफवा दिवसेंदिवस वाढत असून अंबाजोगाई तालुक्यातील कुंबेफळ गावात एका हरणाचा फडशा पाडल्याची घटना उघडकीस आल्या नंतर हरणाचा फडशा मोकाट कुत्र्याने पाडला असल्याची माहिती वनाधिकारी विजया शिंगाटे यांनी दिली आहे.
मागील काही दिवसात अंबाजोगाई तालुक्यातील तेलघना, जवळगाव, मुरंबी परिसरात बिबट्या निदर्शनास आल्याची माहिती मिळाल्या नंतर शहरापासून जवळ असलेल्या माकेगाव गावात काही दिवसांपूर्वी बिबट्याने बैलाचा फडशा पाडल्याची घटना घडली होती. या घटनेमुळे परिसरातील ग्रामस्थांमध्ये भीतीचे वातावरण पसरले आहे. या बिबट्याच्या भीतीने शेतकरी शेतात जाण्यासाठी देखील घाबरत आहेत
अशातच अंबाजोगाई शहरापासून जवळ असलेल्या कुंबेफळ गावात एका हरणाचा फडशा पाडल्याची घटना उघडकीस आली. त्यामुळे परिसरात एकच खळबळ उडाली. या घटनेमुळे कुंबेफळ परिसरातील ग्रामस्थांमध्ये भितीचे वातावरण निर्माण झाले होते.
दरम्यान ही उघडकीस आल्या नंतर हरणाचा फडशा मोकाट कुत्र्याने पाडला असल्याची माहिती वनाधिकारी विजया शिंगाटे यांनी दिली आहे.
अफवा पसरवू नका – शिंगोटे
अंबाजोगाई परिसरात बिबट्याचा वावर दिसून आल्यानंतर वनविभाग सतर्क झाला असून सोशल मीडियावर या घटनेच्या अनुषंगाने इतरत्र ठिकाणचे जुने बिबट्याचे व्हिडीओ शेअर केले जात असल्याचे दिसून आले आहे. दोन दिवसा पासून तर 2011 सालचा कापसाच्या फडातील महिलेवर केलेल्या हल्ल्याचा व्हिडीओ आताचा असल्याचे भासवून व्हायरल केला जात आहे. त्यामुळे कोणीही अशा अफवा किंवा व्हिडीओ शेअर करून नयेत, असे आवाहन वनविभागाच्या वतीने विजय शिंगोटे यांनी केले आहे.
